اوزوموز اولدو قارا اولمادیق ائولاد وطنه

گئجه لر یاتمامیشم بس کی گؤزومدن یاش آخیب
وطنی یاد ائله ییب نیسگیلی باغریمسا یاخیب
ایلدریم دؤزمدی بو نیسگیله دهشتلی چاخیب
اؤز اؤزومله دئییرم تانری گلیبدیر نه منه؟
اوزوموز اولدو قارا اولمادیق ائولاد وطنه


وطنی بئش یئره یوخ اون یئره بیز پارچالادیق
اؤز ائلین دادردا قویوب اؤزگه توزوندن یالادیق
آنا یوردوندا گلیب باشقاسینا اود قالادیق
دوشمن اولدوق اؤزومور غرریله بوکدوخ کفنه
اوزوموز اولدو قارا اولمادیق ائولاد وطنه


بیر مثلدیر کی قارانلیق گئجه نین گوندوزو وار
هر نقدر ایری یول اولسا بئله بیرده دوزو وار
چرخی دؤنموش فلگین بیر اوزو یوخ مین اوزو وار
بسکی رحم ائیله مه دی سالدی منی ضعف تنه
اوزوموز اولدو قارا اولمادیق ائولاد وطنه


ظن ائدیریک چیخا قیش بیرجه داها یاز گلجک
ائلمیزه٬ موسیقیمیز٬تار و قاوال ساز گلجک
بلکه بولبول چمنه نغمه خوش آواز گلجک
بس نه گلدی گؤرسن بولبوله گلمیر چمنه
اوزوموز اولدو قارا اولمادیق ائولاد وطنه


وطن ائولادی گرک سیندیرا قاندال قفسی
دوشمنی محو ائله یه میلتین آزاده سسی
بو یازان شعریوین «احمد» گرک اولسون نفسی
وطن اوغروندا خوشا جانینی قوربان ائدنه
اوزوموز اولدو قارا اولمادیق ائولاد وطنه

اوشتوبونلو احمد