انجمن شاعران ایران
درباره سایت
آخرین مطالب
امکانات وب
بیلمم ندی دوران منه بیگانه دولاندی
دۆنیانی منه ایلدی غمخانه،دولاندی
کؤنلوم یانار اوْدلارلا قوْیوب باش باشا هر دم
شمعین نئجه کی باشینا پروانه دولاندی
ائتدیم نه قدر جهد کی سامان تاپا کؤنلوم
افسوس اولا چاتمادی سامانه،دولاندی
چوخ کس لره کاشانه لر آباد ائله دیم من
کاشانه ده اما منه ویرانه دولاندی
اسکیک اولان اینسان اوجالیب کامینه چاتدی
کئف چکدی بوتون عؤمروده،شاهانه دولاندی
نعمت لره غرق اولدو باخین سایسیز حسابسیز
مست اولدو بو دورانیله مستانه دولاندی
چوخلو ایگیدی ایله دی بیر تۆلکۆ مثالی
چوخ تۆلکۆده باش قوزادی شیرانه دولاندی
نامرد دوروب مرد یئرینه ایله دی جولان
کئف ایله دی دوراندا بو جولانه،دولاندی
ایندی بو زامان دور ائدیب گردش دوران
یوللار مغانا،گرمی یه،زیندانه دولاندی
هئچ فیکرائله مزدیم کی گلیب ایش بورا چاتسین
دوران ولی افسوس کی فتتانه دولاندی
آسوده اولان ییرده بوتون فکر و خیالیم
آخ وایه سالیب کؤنلۆمۆ بیر آنه دولاندی
هر کسله کی دوسلوق ایله دیم صدق دلیمدن
رفتاری بۆتۆن حیله ی شیطانه دولاندی
اۆزده منه دوست اولدو ولی دالدادا دۆشمن
یاندی اۆره ییم،گؤز یاشیم آل قانه دولاندی
دوستوم چوخودو آمما تکم من بو زاماندا
تا دؤندو حالیم، هر بیری بیر یانه دولاندی
بیر لیلی نی سئودیم اؤزومه یار ایله دیم من
ائتدی منی مجنون کیمی دیوانه،دولاندی
جان جان دییه رک جانیمی وئردیم اونا قوربان
غرقم ولی حیرتده کی،جانانه،دولاندی
اظهار ایله دیم عشقیمی،هم وصله تمنا
سالدی منی اما غم هیجرانه دولاندی
اصرار ائله دیم یاره، جفا قیلما آماندی
هئچ باخمادی اصراره ،مصررانه دولاندی
فی الحال کی احوالی پریشان گزیرم من
بیلمم کی نه دور ائتدی نه قالدی نه دولاندی
احوالی پریشاندی، اولوبدور دلی آذر
آخر سوزو شعرینده ،پریشانه ،دولاندی
برچسب:
نویسنده: محمد رضا جوادیان