قوشون نصیحت لری

ائل روایتلری
قوشون نصیحت لری
گونلرین بیرینده بیر شخص قفسده کی بیر قوشو گتیریب، بازاردا ساتدی، اونو آلان آیری بیر آدام ائوینه گتیردی قوشو. بو حئیوان اورا چاتماق همن باشلادی دانیشماغا. قوش بو آداما دئدی:
- منی قفسده اؤلدورمکدن سنه نه چیخار. منی بوشلاسان سنه اوچ سؤز اؤیرهدهرم.
کیشی دئدی:
- من بونا نئجه اینانا بیلرم؟
قوش دئدی:
- سؤزون بیرینجیسینی سنه قفسده، ایکینجیسینیده الده، اوچونجوسوایسه آغاجدا دئیه رم.
قوجا قوشو آپاردی باغا و اونا دئدی:
- سوزلرینی باشلا.
قوش دئدی:
- هر شئی کی سنین الیندن چیخدی، اونا گؤره تاسف له نیب، کدرلنمه.
قوجا کیشی قوشو ائشییه چیخاردیب، اوندان ایسته دیکی، ایکینجی سؤزو دئسین. قوش دئدی:
- او شئی کی، ماحالدی و الده اولمایاندی، اونو الده ائتمیه یه چالیشما.
کیشی گؤردو بو سؤزلر گؤزل سؤزلردی، تئز قوشو بوراخدی، قوش اوچوب قوندو آغاجا و سونرا اوزونو قوجایا توتوب دئدی:
- سهو ائله دین منی الدن وئردین. چونکی منیم قارنیمدا ییرمی مثقال قیزیل واردی.
قوجا بونو ائشیدیب، تأسف لندی، قوش سونرا اونا دئدی:
- منیم سؤزلریمی نه تئز یاددان چیخارتدین. سنه یوخسا دئمه دیم هر شئی کی، الیندن چیخدی تأسف ائله مه. چونکی سنین الیندن چیخمیشام، نه قده ر غصه ائلهسنده گلمه رم. بیرده دئمه دیم اینانیلمامالی سؤزلره اینانما، چون منیم آغیرلیغیم(وزنیم) ییرمی میثقال اولماز، هاردان ییرمی مثقال منیم قارنیمدا یئرله شه جکدیر.
قوجا کیشی دئدی:
- ایندی اوچونجو سؤزو منه دیء.
قوش جاواب وئردی:
- منیم حاققیمدا یاخشی ایش گؤروبسن، لطف ائلهییبسن، یاخشیلغین قاباغیندا گرک سنه یاخشی لیق ائده م. ایندی همین آغاجین آلتیندا قیزیل وار، قاز اونو گؤتور، خرجله.
قوجا آغاجین آلتین قازیر و قیزیلی تاپیر و گؤردویو عمله ایسه چوخ سئوینیر.